Rubriek Stamtäöfelke: Zétj de bóksereem mer op ‘t vrieëtgaetje!

“Schuuftj aan en kriegtj uut!” Afbeelding: Teikening Fred Gubbels/Jac Moonen

Na uitgave van het boek ‘Stamtafel Weert’ zijn er spontaan stamtafels in verschillende etablissementen ontstaan waaruit de verhalen ontspruiten, die al dan niet opgeblazen en gekleurd in de Stamtäöfelkes beschreven worden, maar altijd een basis van waarheid hebben. Deze verhalen worden opgetekend door Frits Weerts en verschijnen wekelijks in weekkrant VIA-Weert onder de naam Stamtäöfelke. Dit is aflevering 100.

Ich waas zoeë meug wi-j ’n maaj, kejkepot en herstikke oppe reûbe, affeng, gein piêp tebak waerd en herstikke nao de kloeëte. Waat dooje dan? Ich haaj ’n good óntlégk um in oongerstóng te gaon. En ich wist woeëtj aan loog. Ich waas lieëlik oongere ker gekaome, haaj e stök in m’n reet en ’t woor eîn en âl zate bermhertigheid umdet ich dach: hâlf zaat és ouch ewéggegoesj gêldj. Gluifdje mich? ’t Zal eur zaligheid zeen ajje ’t gluiftj, mer vör mich ésj vergânge tiêd, want de daag kaome voeërt drieë achtereîn ajje oppe tachtjig aangaotj. En ajje mich toch gluiftj, kân ich uch ouch wiêsmake det Slivvenhieër Pier hétj. En det zoeëj mét baeje e stök gemaekeliker zeen. Mer waat heejboeëve és beschrieëve zoeëj umtrîntj sestig jaor gelieëje gekónne hebbe want as ich d’r noow drej drînk, val ich al in slaop. Des neet good vör de kastelein, mer waal vör mien buuërs en mien gemood sdaags d’rnao. Waat ich prebieër te be-uige és, wi-j schoeën oetdrökkinge oeës Wieërter taal toch hieët. Aanne stamtaofel wiltj d’n-eine-of-d’n-ângere oeëverjaorige tûnkvöl nog waal ’s stoefe mét zoeë’n schoeën uutdrökking, mer beej ’t jónger vôlk valle ze âmper nog te beloêstere. Jaomer. Eîgelik mós in eêder hoêshaoje, zjuust wi-j beej protestânte de bîbel, ’t book “Waat ‘ne kâl” oppe hoêskamertaofel ligke. Klaor um ’s in te uige.Det book és vuuërig jaor doeër Veldeke Wieërt oetgegaeve en és inne bookhândel (en beej Veldeke) nog te koup. Neet te gluîve wi-jvöl echte (Ni-j)Wieërter spruuëke en schoeëne schaele wazel dao-in stieët. ‘t Zoeëj toch schoeën zeen as ve di-j wuuërd en oetdrökkinge weer wat mieër zooëje gaon gebroêke.

En vanwieëge dit Hóngerste Stamtäöfelke traktieër ich vandaag op ‘n aetentje op z’n Wieërts. Ve beginne mét ’n tas poongelsop mét e gesnupperdj oeëndjepiêpke en wat snatzele d’r in. Op gebakke schiefkes rebouw of binneruuëtjes légke ve sepietjes en verseêre det mét ’n half permejoeël. Tössedoeër begaaje ve os nog aan ’n schuuëtelke gestoeëfdje keêle mét heîtepiekes en ’n dröppelke gesmôlte goojboeëter. As hoeëfdgerecht pakke ve ’n alike schroêt, piepers, kni-jboeëne en muuërkes. Mer ge moogtj ouch ’n hieëske mét krekânte zwaars en krolmoos mét oeëndjesuîske pakke. As naogerecht gein lemkespap of slêmp, mer leêver e stökske smoelvlaaj, of e schuuëtelke môlsbieëre mét poejersókker. Zat vör vandaag. Mêrgevreug pakdje uch ieërst mer ’n schief kerboêt mét kroêt en ’n schief têrvemik mét huitkieës. Paktj d’r uch ounog mer e redieske en e glaas boeëtermêlk beej. Ajje det op hetj mooje grösj ‘ne kieër käöke. Detj uch waal moge bekaome. Woeë bliêve de fillesetasies?

Reagieëre en/of beuk bestelle: frits.pop@ziggo.nl

Door Frits Weerts
Nederweert